Վերջին շրջանում կորոնավիրուսի նոր տեսակի համաճարակը ձեռք է բերել պանդեմիկ բնույթ՝ դառնալով համաշխարհային խուճապի պատճառ: Նման իրավիճակում խնդիրը կարող հեշտությամբ էլ ավելի սրվել, ուստի նման զարգացումներից խուսափելու համար գերմանացի բժիշկ Միխայել Ֆելդը «Բիլդ» (Bild) պարբերականի հետ զրույցում ներկայացրել է այն պարզ կանոնները, որոնց հետևելը կօգնի նվազեցնել վարակման հավանականությունը:
Հաճախ զբոսնել մաքուր օդին Մասնագետի խոսքով՝ ֆիզիկական ակտիվությունը մաքուր օդին բարելավում է թոքերի օդափոխումն ու արյան շրջանառությունը՝ դրանով իսկ նվազեցնելով թոքաբորբի զարգացման հավանականությունը, որն էլ համարվում է կորոնավիրուսային վարակի հետևանքով մահվան գլխավոր պատճառը:
Վիտամին D-ի գործածություն Ձմռան ամիսներից հետո այս վիտամինը շատ կարևոր նշանակություն է ունենում մարդու իմունային համակարգի համար, ուստի մասնագետը խորհուրդ է տալիս վիտամին D-ի հավելումներ ընդունել: Չորս շաբաթ այս վիտամինն ընդունելուց հետո հարկավոր է ստուգել դրա մակարդակն արյան մեջ և անհրաժեշտության դեպքում շարունակել կուրսը: Սա հատկապես կարևոր է այն մարդկանց համար, որոնք քիչ ժամանակ են անցկացնում արևի ճառագայթների տակ:
Առողջ քուն Մասնագետի խոսքով՝ մարդը պետք է օրական քնի մոտ 8 ժամ, քանի որ միայն առողջ ու բավական տևական քնի դեպքում հնարավոր կլինի ինչպես հարկն է ամրապնդել իմունային համակարգը:
Օգտագործել մրգեր ու բանջարեղեն Թարմ մրգերն ու բանջարեղենը պարունակում են մեծ քանակությամբ վիտամիններ ու հակաօքսիդանտներ, որոնք շատ կարևոր են օրգանիզմի համար: Բացի այդ, դրանք հարուստ են հակաբորբոքային ազդեցությամբ օժտված տարրերով, որոնք նույնպես ամրապնդում են իմունային համակարգը:
Կոկորդի ողողումներ անել Կոկորդում տհաճ զգացողությունների առկայության դեպքում հարկավոր է անհապաղ միջոցներ ձեռնարկել: Նման դեպքերում վարակումից պաշտպանվելու արդյունավետ միջոց կարող են լինել քլորհեքսիդինի լուծույթով ողողումները:
Հիշեցնենք, որ կորոնավիրուսի համաճարակի մասին Չինաստանի իշխանություններն ԱՀԿ-ին հայտնել էին դեկտեմբերի 31-ին: Հայտնի է, որ վիրուսը տարածվել է Հուբեյ նահանգի Ուհան քաղաքից: Չինաստանի սահմաններից դուրս վարակների մեծ մասը հայտնաբերվել է Հարավային Կորեայում, Իրանում և Իտալիայում: Ընդհանուր առմամբ, վարակի դեպքեր են հաստատվել ավելի քան 110 երկրում:
Ամբողջ աշխարհում կորոնավիրուսով վարակվածների ընդհանուր թիվը հասել է 145 931-ի, մահվան դեպքերը 5440 են: Հայաստանում հաստատվել է վարակի 18 դեպք։
